මෙරට ඉතිහාසයට අඳුරු මතකයක් එකතු කරමින් වියරු මුස්ලිම් අන්තවාදී ත්‍රස්තවාදය විසින් පුද්ගලයින් 269 දෙනෙකුට මරු කැදවූ පාස්කු ප්‍රහාරයේ දෙවර්ෂ පූර්ණය අදට යෙදී තිබේ. 2019 අප්‍රේල් 21 වනදා උදෑසන මෙරට කතෝලික දේවස්ථාන 3 කට සහ කොළඹ පිහිටි ප්‍රධාන පෙළේ හෝටල් 3 ක් ඉලක්ක කර ගනිමින් එල්ල වූ මෙම ත්‍රස්ත ප්‍රහාරයෙන් පුද්ගලයින් 269 ක් මියගොස් 500 කට අධික පිරිසක් තුවාල ලැබීය.
එම ප්‍රහාරයෙන් මියගිය සහ තුවාල ලැබූවන් සිහිපත් කරමින් අද උදෑසන 08.45 ට විනාඩි 02 ක නිහඬතාවයක් පවත්වන බව අගරදගුරු පදවියේ ජනසන්නිවේදන අධ්‍යක්‍ෂ ජූඩ් ක්‍රිෂාන්ත ප්‍රනාන්දු පියතුමන් සදහන් කළේය. ප්‍රධාන දේව මෙහෙය කොච්චිකඩේ සාන්ත අන්තෝනි දේවස්ථානයේදී පැවැත්වෙන බවද ජූඩ් ක්‍රිෂාන්ත ප්‍රනාන්දු පියතුමන් සදහන් කරන ලදී.
මෙම ත්‍රස්ත ප්‍රහාරයෙන් විදේශිකයින් 46 දෙනෙකුටද දිවි අහිමි විය. එම විදේශිකයන් වෙනුවෙන් එම රටවල තානාපති නිලධාරීන්ටද කොච්චිකඩේ දේවස්ථානයේදී පැවැත්වෙන සැමරුම් උත්සවය සදහා එක්වන ලෙසට ආරාධනා කර ඇති බව අගරදගුරු පදවියේ ජනසන්නිවේදන අධ්‍යක්‍ෂ ජූඩ් ක්‍රිෂාන්ත ප්‍රනාන්දු පියතුමන් සදහන් කළේය.
පාස්කු ප්‍රහාරයෙන් පවුල් 400 කට අධික සංඛ්‍යාවකට බලපෑම් එල්ල වූ අතර එම ප්‍රහාරයෙන් සදාකාලිකව ආබාධිතව රෝද පුටුවල දිවි ගෙවන පුද්ගලයින් සංඛ්‍යාව 17 අධිකයි. ජාතික තව්හිද් ජමාත් සංවිධානයේ සහරාන් හෂීම් ප්‍රමුඛ බෝම්බකරුවන් එල්ල කළ මෙම මිලේච්ඡ ප්‍රහාරයෙන් තුවාල ලබා මේ වනවිට පුද්ගලයින් 47 කට අධික සංඛ්‍යාවක් එක්තැන්ව සිටි.
මෙම ත්‍රස්ත ප්‍රහාර මාලාව පිළිබද 97ත් වතාවක් බුද්ධි අංශ වෙත තොරතුරු ලැබී තිබුණද ඒ සදහා කඩිනම් පියවර නොගැනීම මෙම ප්‍රහාරයට හේතු වූ බව පාස්කු කොමිසමේදීද අනාවරණ විය. පාස්කු ප්‍රහාරය සම්බන්ධයෙන් මේ වනවිට බොහෝ පිරිසක් අත්අඩංගුවට ගෙන සිටියද මෙම ත්‍රස්ත ප්‍රහාර මාලාව සම්බන්ධයෙන් සිදුකෙරන පරීක්‍ෂණ පිළිබද සෑහීමකට පත් නොවන බව අගරදගුරු පදවියේ ජනසන්නිවේදන අධ්‍යක්‍ෂ ජූඩ් ක්‍රිෂාන්ත ප්‍රනාන්දු පියතුමන් සදහන් කළේය.
පාස්කු ප්‍රහාරයට වසර දෙකක් සපිරෙන අද දිනයේ සියළුම කතෝලික පාසල්වල් වසා තැබෙන බවද කොළඹ අගරදගුරු මැල්කම් කාදිනල් රංජිත් හිමිපාණන් සදහන් කළේය.
